好消息好消息！香港人出年1月8號起就可以免隔離返內地啦！Boxing Day夜晚11點左右宣布嘅呢個好消息，對於一眾留港或海外黃絲嚟講，反而變成「世界末日」，各種責怪說話迅速喺網上各大平台瘋傳。佢哋鬧得最多嘅就係：中國政府不負責任，呢個時候通關，擺明係「播毒」。咁都噏得出，真係嬲到本俠不吐不快！

國家衛健委喺26號晚宣布，備受國民關注嘅出入境管制將會調整，到時入境內地嘅人士只需提供48小時核酸陰性結果，就可以免隔離返內地啦。

對於一班兩地分隔長相思嘅中港家庭嚟講，呢個消息直頭係久旱逢甘雨！有幾咁多中港家庭，小朋友出世之後兩年幾都冇見過自己爸爸，有幾多父母，因為封關，錯過咗仔女最珍貴嘅成長階段。面對呢啲苦楚，黃人一於選擇性失明，只要中國政府作出嘅決定，一定係錯，就好似「原罪」一樣，深深烙印喺中國政府身上。簡單啲講，喺小黃人們眼中，中國係冇「呼吸權」嘅！ 

睇返黃人嘅「申訴」理由，比較普遍嘅就係話內地政府好揀唔揀，偏偏揀內地疫情嚴重嘅時候先嚟通關，又話到時內地旅客嚟到香港之後，會搞到本地香港人冇啖好食，想買嘅嘢都買唔到云云。但係黃人睇唔到嘅係，中國政府喺過去近三年以嚟喺防疫方面、喺保障內地人民生命安全方面所作出嘅努力，縱使喺具體執行方面有好多值得改善嘅空間，但係亦都唔至於差到好似黃人口中所講嘅一文不值，大錯特錯！

本俠反而想問吓啲黃人：點解香港可以喺國際依然疫情不息嘅時候提前通關，同內地就永遠唔通得呢？點解你哋可以一張機票世界各國周圍飛，中港家庭只係想同差唔多3年冇見嘅親人團聚就唔得？輸打贏要係黃人嘅本性，呢個本俠都明白，但係有時真係唔好咁離譜喎。

其實同黃絲講多都嘥gas，喺佢哋眼中，中國政府做乜都係錯。留喺香港嘅黃絲自然唔使講，梗係唔想通關；而辛辛苦苦移民出去嘅黃絲更加要加把口，證明自己走得正確，如果唔係點對得住自己損手爛腳滾出去嘅辛酸呀？

原圖：新華社圖片