第94屆奧斯卡頒獎禮經已落幕，然而今屆嘅焦點零舍唔同，大家關心嘅並唔係邊位明星拎影帝影后，亦唔係邊套作品拎最佳電影，而係出爐影帝韋史密夫（Will Smith）當眾掌摑好友兼頒獎嘉賓基斯洛克（Chris Rock）。

事緣基斯喺頒發最佳紀錄片獎前，或者係想搞吓氣氛，竟嘲笑韋史密夫妻子珍達碧姬（Jada Pinkett Smith）嘅光頭。珍達曾公開表示受脫髮問題困擾多年，迫不得以先要剃光頭，如今畀基斯借痛處開玩笑，珍達喺台下當場黑面，而護妻心切嘅韋史密夫一怒之下亦隨即衝上台掌摑基斯，為妻子出一口氣。

韋史密夫呢一巴掌實在太震撼，以至於佢憑藉《王者世家》登基奧斯卡影帝，亦完全無法蓋過「世紀一巴」嘅光芒。事件隨即成為各大傳媒頭條，輿論普遍認為韋史密夫唔應該使用暴力，就算大家都認為基斯出言不遜有錯在先，亦理解韋史密夫為何憤怒，但呢啲絕對唔係美化暴力嘅藉口。

韋史密夫大可向奧斯卡會方投訴、亦可透過傳媒公開闡明立場、更可私底下直接向基斯表明不滿並要求道歉，但佢偏偏選擇咗最愚蠢嘅做法––訴諸暴力。結果，即使韋史密夫多次為自己嘅暴力行為而道歉，《紐約郵報》報道指有荷李活中人對其喺盛事中使用暴力大感不滿，揚言研究收回影帝寶座；同時洛杉磯警方亦介入調查，不過據聞被打嘅基斯拒絕追究指控韋史密夫。

由此可見，韋史密夫摑基斯呢一巴掌，並非幾個人之間嘅事，韋史密夫不但有違公眾期望，隨時辜負《王者世家》嘅拍攝團隊，更甚者係可能宣揚錯誤嘅暴力訊息。

香港人對此感受最深，2019年有一班人因為不滿政府而走上街頭，佢哋放棄其他一切可以解決問題嘅辦法與溝通渠道，選擇踏上使用暴力呢一條不歸路，以汽油彈同磚頭去宣洩不滿，破壞社會攬炒香港，然後再話自己所做一切都係「迫不得已」，企圖為暴力行為開脫。

是次事件正正係當日香港黑暴嘅縮影，只不過少咗政治元素，少咗西媒刻意嘅美化，大家都睇得清清楚楚，從來都冇人會接受暴力，韋史密夫呢一巴掌除咗為妻出氣，亦狠狠咁摑咗所有曾為暴力塗脂抹粉嘅人！

原圖：無綫新聞截圖、星島日報、Will Smith instagram圖片 
https://www.instagram.com/p/Caia8xOvOTc/?utm_medium=copy_link