疾呼「一年冇戲拍」的黃影帝黃秋生轉戰電視，結果冷手執了一個熱煎堆，執埋「視帝」金獎杯。話說黃影帝「執金」過程，可謂一波三折曲折離奇，先是「東網」搞咗一個「東網民選TV King & Queen」，投票結果顯示陳展鵬以8,680票13,248次瀏覽獨佔鰲頭，黃秋生只得450票列梗頸四……殊不知，TVB靠專業評審出手扭轉乾坤，一錘定音頒咗畀黃影帝。 想問官方評審觀眾投票部分結果如何？對唔住，舊年確實係有公諸於眾，今年就唔知點解秘而不宣，只道10萬人參與投票，總投票數係582,194，至於當中有幾多票投咗畀煎PAN呢？唔知，唔講，唔明點解。

大台漠視民意？薑都係老嘅辣！

眼見黃影帝被欽點視帝，有人批評大台漠視民意，而隻抽俠就覺得，薑都係老嘅辣……大家試想想，以TVB今時今日嘅片酬，請唔請到劉德華呢啲一流卡士來拍劇？退而求其次，箍住黃秋生長拍長有都係非常抵用嘅！同時又可叫佢修吓把口唔好成日亂噏，一方面令社會詳和一啲，一方面對TVB自己亦有好處，一石二鳥！ 秋生今次退「黃」出盡全力，更似乎得到多方配合支持。蘋果全力幫手不在話下，TVB 出錢出力更出金，雖然演出show錢不會太高，但金仔（視帝）都出埋，算係好幫手了。睇來，黃秋生對幕後高人交心係真嘅，肯定不是交演技算了，黃秋生肯變「黃（色）抽身」，也不失是好事！最緊要不要衰多口，害自己。 隻抽俠實事求是咁講，對於黃影帝今次加冕視帝，論人氣，佢輸九條街，論演技，佢確實技高一籌，大台老薑睇中老薑，當敬老呢個邏輯都勉強講得通……

知今是而昨非 脫黃底仍待觀察

不過不過，講到修口咯喎……黃影帝總是要些面子的人，忍唔住又會失驚無神爆出兩句，但已經冇太入肉，亦更不敢太黃咁解。 嗱嗱嗱，話口未完，黃視帝又喺台上亂講嘢嘞，喊晒口埋怨話「我以為攞完金像獎，下個係奧斯卡」喎！係純粹搞爛GAG炒氣氛？還是大台熱臉貼上冷屁股，人家黃影帝根本唔稀罕你個視帝？ 再問大台呢個金仔，是否真的可以換得黃影帝浪子回頭？睇睇，再睇睇…… 原圖：無綫截圖

投票已截止，多謝支持