浸大嘅陳同學唔止聲大夾惡無禮貌，原來仲好無賴… 話說今日浸大第二日加開聘任校長諮詢會，錢大康亦準時出席，但係學生會會長陳同學同另外十多名學生，喺諮詢會開始後廿幾分鐘先至到達會場。即係話，佢哋遲大到！ 如是者，現場保安就以遲到為由拒絕佢哋入場，但班學生就發惡話，即使上堂都有十五分鐘「緩衝時間」。結果擾攘咗十幾分鐘，保安頂佢唔順，惟有畀佢入場。 講到呢度，隻抽俠不得不寫個「服」字，明明遲到都可以講到大條道理！試想呢班「黃衛兵」第時出來打工，遲到後同老細講係「緩衝時間」，好得戚咁走返埋位，你估老細會點？ 遲大到都未止。呢，陳同學之前咪一路鬧校方太遲通知諮詢安排嘅？但校董會主席鄭恩基今日篤爆，其實校董會星期一決定加開三場諮詢會前，所有安排都已得到學生會會長即佢本人嘅同意。換言之，即係陳同學向傳媒講大話。 守時同誠實係做人嘅基本操守，但陳同學似乎都做唔到，其實閣下有冇諗過，你哋會影響已經入場嘅人呢？照咁睇，你哋完全為己、全不顧人，似乎冇理過其他人嘅感受喎！ 不過鄭恩基話，聽日舉行第六場聘任校長諮詢會後，唔會即日決定委任新校長，會交畀遴選委員會考慮。校方退完一步又一步，不斷向一小撮激進學生屈服，究竟想點呢？