曾經開足火力狂鬧警察的黃影帝黃秋生，出來澄清自己「冇撐佔中」了！而且係透過「佔中宣傳總部」蘋果日報表明心跡，真係唔到你唔信！

講開黃秋生呢趟表白，佔據蘋果娛樂版顯要位置，大剌剌做足四份三版專訪，但基本上來來去去只係表達一句，就係──黃影帝自認不黃不撐佔中！佢話喎，內地認為佢撐佔中發出封殺令係「殺錯良民」，申訴「我諗嘅嘢，我講嘅嘢，我做嘅嘢，其實人哋點樣理解，我係唔能夠控制。」唔信？自己上去蘋果睇睇！

壹傳媒變咗洗底專家？

言下之意，是否所有人都誤解佢？黃影帝從來冇「黃」過？係真唔係真？被人誤會還是被人陷害？各位市民，大家有冇屈咗佢？究竟蘋果搞邊科呢？

諗唔通？隻抽俠可以畀個貼士大家，統計整篇專訪連配稿，總共出現三次「沒有戲拍」，四次「經濟壓力」，以致「有十幾人要養的他經濟出現危機」......適逢區舉前夕，政客為保飯碗告急大家聽得多，影帝冇戲開要告急都係第一次見！黃秋生的精湛演技，實令左右紅藍黃之所有陣營大開眼界，嘆為觀止，以致擘大個口得個O字。

唉，覺今是而昨非......人不為己？明白晒！

下次到黃之峰來脫黃？

點都好，恭喜黃影帝，得到蘋果為佢撥亂反正，話佢冇支持佔中。真相大白。黃影帝自認不黃了，佢咁認，蘋果都咁講，仲唔係真？

不過有趣嘅係，蘋果今次做初一，幾時會做初十五，十六直到初一千零一？下一個出來認我唔黃，我唔撐佔中嘅係公民黨，李卓人，民主黨，定係戴耀廷，黃之峰？

真係世事無絕對，壹傳媒竟然做咗脫黃專家，洗底王？！

原圖：http://star.ettoday.net/news/90620