香港警察，值得信賴！當人生路不熟，天寒地凍喺他鄉遇到困難時，你會向咩人求助？喺香港梗係搵香港警察！前日（22日）正值冬至，兩位喺韓國留學嘅內地學生，搭飛機到香港諗住過個開心聖誕。當佢哋諗住從機場啟程去朋友屋企時，竟然收到咗衛生署發畀佢哋嘅核酸「陽性」短訊通知！好在有西九龍衝鋒隊第三隊嘅成員喺凌晨時分，發現到徘徊喺街頭彷徨無助嘅佢哋，畀佢哋臨時休憩嘅地方，仲提供食物。第二日（23日），佢哋兩個順利入住隔離設施！

由於酒店唔接受臨時入住嘅旅客，佢哋唔想朋友受感染，所以決定捱凍喺渡船街頭等衛生署通知。好在呢個時候，西九龍衝鋒隊第三隊嘅人員喺23日凌晨時，發現佢哋並提供即時協助。經過人員聯絡不同部門之後，最快都要第二日（23日）上午先可以佢哋兩個去隔離中心，於是就安排佢哋喺西九龍衝鋒隊基地短暫休息，為佢哋提供食物。提供溫暖同安全之餘，最緊要係等佢哋感受到香港嘅人情味。最後，喺23日中午，佢哋成功獲檢疫巴士接去竹篙灣社區隔離設施。

感謝香港警察，令呢兩位年輕無助嘅迷途小羔「陽」，度過難忘溫暖又安全嘅一個夜晚！

原圖：兩位學生提供