香港記者協會向來立場偏頗黃到出汁，過去多次雙重標準嘅言行令人髮指，與其「致力維護新聞自由及操守」嘅宗旨可謂完完全全背道而馳，竟然仲可以生存到今時今日，都算得上係一個奇蹟。記協有幾咁不濟，相信會員自然最清楚，唔想攬住沉船亦係人之常情，據記協現任主席陳朗昇所講，喺該會日前（23日）嘅特別會員大會上，就有與會者提及「解散」二字，莫非記協真係嗰頭近？

陳朗昇於會後回應傳媒有關記協解散嘅問題時，聲稱要保障各會員發言自由及安全，所以唔會透露會議內容，只係話會喺5月底前繼續收集書面意見，再作討論及分析云云。至於記協會否解散，陳朗昇始終支吾以對，僅表示「解散」二字肯定有人提過，但唔代表記協最終一定會解散。

存在價值愈嚟愈低

其實，記協此前公布舉行特別大會時，已提及議程將包括「需否修改會章以配合未來方向」，當中就涉及到解散門檻及剩餘資產安排等，令外界關注今次大會或與記協解散有關，當時陳朗昇回應時就講到，隨住多間傳媒機構停運、傳媒人被捕，會員間對記協存亡有所疑慮，「大家都知記協係on the list」，好明顯係自己知自己事，如今仲扭扭擰擰咁話唔一定會解散，又有乜為呢？

記協近年嘅存在價值愈嚟愈低，所發「記者證」已不獲警方承認，加上黃色傳媒如《蘋果日報》、《立場新聞》等先後因涉嫌違反《港區國安法》而停運。記協樹未倒而猢猻先散，依家仲要苟延殘喘，繼續獻世噁心香港人，又是何苦？與其等日後可能因各種其他原因而被收檔，倒不如趁依家體體面面、風風光光咁自行解散，對自己好，對香港人又好，咪win win雙贏囉！

原圖：記協Facebook

https://www.facebook.com/HKJA.official/photos/a.480963540308/10158605132500309/