上兩篇文章為大家介紹左海洋博公園以及沖繩美麗海水族館。今日好快咁講埋上圖最右手邊既沙灘，就會講解交通指南。 翡翠海灘 翡翠海灘夏天既時候真係會開放比遊客游水的。而呢個海灘既水質係ＡＡ級的，鍾意遊水既朋友就要試下喇，每年４月至９月免費開放。 沙灘分為三個專區，最右手邊係休息的海濱，唔可以游水的。而正上方既係眺望的海濱，同樣唔可以游水，對開有一個好似龜背咁既小島仔，影下相幾得意既。而右手邊叫做遊戲的海濱，呢個真係可以游水喇，仲有救生員的。呢度留番比大家去親身睇下，影沙灘會比人以為我係痴漢的。 呢度可以租太陽傘、救生衣、浮板、水泡乜都有。更衣室同埋沖身既地方當然有啦，仲要係免費既添，而儲物櫃就係￥100一個，同香港既唔同，呢￥100用完唔會退番比你的。 睇交通指南之前，留番海洋博公園既官方網址比大家睇下啦。入面有齊營業時間，以及之前介紹過既各遊樂設施既介紹。（http://oki-park.jp.t.ms.hp.transer.com/kaiyohaku/） 交通指南（那霸市內出發） 由那霸市區出發，搭長途巴士，２小時２０分鐘就可以直達海洋博公園。不過呢條巴士線比較特別，那霸巴士總站竟然係無站的！要搭就要去那霸機場。 要小心既係，呢條巴士線係無編號的，名稱係やんぱる急行。不過唔駛擔心，認住上面呢個２號巴士站就岩架喇，下面比埋時間表大家。 落車站係記念公園前，唔係沖繩美麗海呀！不過呢個站好多人落車的，加上車上面有落車提示顯示屏，唔駛擔心唔識落車。另外，日本巴士出名準時，你較定鬧鐘訓醒落車都無問題。好喇，車到了，上車！ 總站係運天港，車頭寫明經過海洋博公園，而又無編號既話，就一定岩架喇。上左車之後，大約一個小時左右，巴士會喺一個道邊駅停數分鐘，比大家去洗水間或者買野飲，司機會數齊人先再開車的。 上圖係車內既落車顯示屏，記念公園前站落車，車費係￥２０００一位，車上有找續的，不過如果你幾個人既話，司機未必有幾萬yen找比你，上車前去機場地下既服務中心唱散紙吧，這是機場免費服務，佢地好樂意幫你的。 另外又醒下各位讀者，服務中心旁邊有間當地既旅行社櫃位，買水族館入場券有折的，不過由於我係搭上午８：４０既班次，所以旅行社未開門，大家落機既時候可以順手買定。 跟住以下係回程既時間表： 大家可以見到，最夜既一班車係１６：２８，筆者都係搭呢班車走的，出到去那霸市七點架喇，如果大家好似筆者之前兩集咁介紹既方式黎玩的話，１６：２８前越對係趕得切的。不過由於係尾班車，所以早少少黎排隊好啲，單層巴士滿座就閣下自理架喇。 上圖就係回程出市區既巴士站牌，有人用行李黎霸位添。而對面馬路就係今朝黎既時候落車既地方。 交通指南（名護出發） 雖然水族館位於名護，但係由名護搭巴士過黎都要成個鐘，大家可以由名護巴士總站（下圖）搭６５、６６或者７０號巴士過黎。班次都算ＯＫ既，夾埋黎講一個鐘入面都有１至３班車。唯一要小心既係，以上三條巴士線都係用順時針或逆時針方式行車的，所以要留意不同班次既上落車地點是不同的。筆者影左張相比大家參考（回程返名護時間表），下面寫清楚邊班車係Ａ方向上車邊班係Ｂ方向上車架喇。至於名護出發喇喎，總站上車兩個方向都會黎得到。 自駕遊既朋友就方便得多了，呢度有５００個免費車位任你泊，露天既多數無位，駛前少少會有個多層停車場，泊入去就岩架喇。呢個多層停車場仲方便，一行出黎就係沖繩美麗海水族館。 一連三集既海洋博公園終於完結，對行程上有問題既可於facebook提出。下一次既主題係沖繩另一個遠離市區但係又好出名既－美國村。敬請留意收睇。 圖：由作者提供，翡翠海灘地圖轉載自海洋博公園官方網站