恭喜發財，今日繼續大阪篇。呢幾日相信大家都有充足既利是錢架喇，所以我地今日去街Shopping，大阪市內無乜特別行街既好地方，一係去梅田附近行商場，否則既話，大部分遊客都係會去心齋橋。不過喺介紹心齋橋之前，要介紹間酒店先。 今次為大家介紹既係呢間Best Western Hotel，呢間係集團式酒店，單單香港已經有三間分店。所以係有質素的，就連Flyagain都有向網友推介過呢間酒店。另一方面，呢間酒店係勁近長堀橋站，落車行5分鐘就到，而長堀橋距離心齋橋只係一站之隔，就算你唔想花錢搭車，行都只係20分鐘左右。另外再提一提旅遊書無提過既野，就係長堀橋站同心齋橋站之間其實係有一條地下商店街連接住的，裏面有好多食肆，少量藥房同美甲店等等。所以如果遇到落雨，可以沿地下街過去心齋橋站。 依家由酒店出發，行過去心齋橋俾大家睇。 醫護人員用品專門店你見過未？入面除左有衫之外，仲有唔同款色既聽診器，血壓計等等。好多當地人黎呢度買野送比醫科專業既朋友，淨係講聽診器都有好多顏色比你揀，不過喺香港人既角度，如果你見到個醫生用迷彩色聽診器既話，你就會話佢唔專業架喇！ 當你去到上圖既位置，表示你已經到左心齋橋既入口，不過我地唔入去住，向張相既背面出發左先。 呢段心齋橋比較少人行，睇既野亦唔算多。最特別既只有上面呢間KitKat，唔行既話，可以行番去真正既心齋橋喇。 淨係睇相，都可以見到呢度有幾間出名既Shopping熱店。最平既當然要數GU，GU係UNIQLO既旗下品牌，主打年青人平價衫，一件T-Shirt賣20幾蚊港紙都有。另外女仕們常去既WE GO呢度都有（當然啦，依傢連海港城都開左本地第一間分店了）。唔少得既當然係夾公仔啦。 四四方方──箱壽司 嚟到大阪點可以唔試下箱壽司？ 心齋橋呢度有間陳年壽司店，叫福壽司。專食箱壽司的。唔好睇上面呢盤好似好少咁，其實箱壽司既壽司飯係壓到好實的，食幾粒已經好飽，呢盤壽司我同我老婆兩個人食先食得晒。下次到你地去既時候，叫一盤食唔晒先好再叫呀。價錢方面又唔係好貴，上面呢盤壽司唔駛三千￥，即係大約200蚊港紙左右。 美國村 行完心齋橋，過去地圖既左手邊，呢度統稱為美國村，比較多HIP-HOP同歐美既品牌，當然仲有動漫嘢啦。 上圖呢間Mandarake，樓高三層，有動漫、合金玩具、色情poster等等乜都有，如果大家好記性既話，筆者東京篇介紹中野時都有介紹呢間店。 最後，我要向大家道個歉，美國村最後一個必到既景點係一個叫BIG STEP既商場，裏面有賣足球波衫既店鋪，亦有一層係專賣Cosplay、歌德時裝既鋪（好出名的）。不過講左咁耐，筆者開心到唔記得影相，所以只可以用文字介紹，見諒。 下星期日，我地繼續去心齋橋搵食，不過今次唔係打直行，而係打橫行，去道頓堀。到時見。 圖：由作者提供，地圖取材自谷歌地圖。