恭喜發財，新年快樂。新一年，本人代表HKG報生活台祝大家新一年去多幾次旅行，空喼去滿喼返。 新年檔期，大家都應該出晒去旅行或者拜年，我就二月尾去日本，今次會去名古屋、金澤同秩父，大家等睇我既旅遊介紹啦。呢個大家都忙既月份，應該無乜人會上網架喇，所以精彩野留番三四月先推出。呢個月等我寫番幾篇實用文等大家旁下身算。（根本就係懶，唔係忙） 近年，由於廉航既關係，多左香港人去大阪。所以一連幾星期，筆者都會為大家介紹下大阪。首先當然要講下機場同埋機場既交通先啦。 上面幾張相可以睇到，其實關西機場唔係好大。主要既出入口都得係一個，就係二樓條天橋。可以去到JR同埋南海電鐵總站，再行遠少少（約１分鐘左右）就會去到機場酒店。不過如果你係搭香早航空既話，就要使用第二航廈，來往既方法就係步行去機場酒店地下既巴士站搭免費穿梭巴士（如下圖，車程約7-9分鐘）。 第一航廈交通 ＡＢＣＤ出口都係巴士站，上年開始，關西機場加開左通宵既巴士線，等各位搭廉航零晨機到埗或者出發既朋友都唔駛再瞓機場了。班次及詳情可去機場官網睇http://www.kansai-airport.or.jp/tw/morning-midnight/access/index.html 呢個機場除左LAWSON便利店之外，只有呢間麥記，以及機場酒店大堂既BURGER KING係24小時營業。夜機既朋友都幾悶，所以岩時間既話搭通宵巴士出市區好過喇。 地下見到呢部賣SIM咭既機，不過一睇，嘩！食水好深喎！大家都係買筆者介紹過既日本富士卡，或者Docomo 8天上網卡好過。 好喇，過去地鐵站。一個大堂左邊係南海電鐵；右邊係JR。而各自既側邊就係各自既客務中心。用黎買一日PASS等等的。好易搵，好易睇。 一般黎講，初次去大阪既朋友都係會選搭南海電鐵，一黎，有人稱大鐵人號既機場特急車坐；二黎，只需39分鐘就可以直達大阪既中心難波（再轉一個站地鐵就到心齋橋）。而JR就比較方便住得遠少少既朋友，例如梅田、新大阪或者係天王寺周邊。 提提大家，如果想搭南海電鐵既話，出發前可以上去佢個官網（有中文亦有英文）睇下： http://www.howto-osaka.com.t.iv.hp.transer.com/top/ticket/railway/ 南海電鐵有好多優惠票提供比遊客的。就好似筆者就買左Yokoso Osaka Ticket，呢個係包左單程大鐵人號往難波以及一張大阪市鐵一日任搭既PASS，只需\1500。係非常抵，因為淨係大鐵人號單程已經要\1390。詳情自己去官網睇或者EMAIL比我啦。 下一集，筆者會帶大家去大阪既旅遊區心齋橋行下，食下大阪獨有既箱壽司。下星期日見。 圖：由作者提供，機場地圖轉載自關西空港網頁。