【HKG訊】民主黨尋日召開緊急中委會，討論由何俊仁提出凍結黃成智的黨籍問題，結果一如外界所料，民主黨中委會以二十一票支持，一票反對，大比數通過凍結黃成智黨籍。民主黨仲話紀律委員會將會舉行研訊，決定是否革除黃成智嘅黨籍。黨主席劉慧卿「完事」後就話，希望黃成智或其他黨員，唔好發表違反黨立場的言論，否則民主黨可以採取行動。今次擺明係殺一儆百啦！ 點解民主黨要凍結黃成智黨籍，仲要狠到踢佢出黨？皆因黃成智發動政改「袋住先」聯署行動，得罪咗黨內大佬同其他激進勢力，而其中一個肯肯定係AV仁。隻抽俠唔會在此詳解黃何二人過去有咩恩怨情仇，但有一點一定要講下，就係投票結果。 無錯，隻抽俠想講吓嗰「一票反對」，呢一票，令人無限遐想，究竟係邊個撐黃成智呢？黃成智已經唔係中委，所以無可能投畀自己，換言之，最起碼有一個中委撐佢。 據了解，今次中委會投票係用暗票形式進行，所以真係天知地知投嗰個知，但係有一點可以肯定的，就是撐黃「那人」卻在燈火欄柵處，很可能都支持政改「袋住先」。斷估唔會AV仁精神分裂或良心發現，自己投返反對票啩！ 隻抽俠不禁思疑，如果民主黨中委會多幾個「我是黃成智」，今時今日就唔會企得咁硬無彎轉啦！可惜可惜，可悲可悲~~