經常在社交平台發表「偉論」的黃影帝黃秋生，繼早前出面澄清自己沒撐佔中，語重心長寄語後輩要學好普通話方便北上掘金後，昨日又忽然透過《蘋果日報》大鬧「愛港行動」召集人陳淨心是「茄哩啡」，指她斷撐佔中女歌手盧凱彤「米路」，踢爆盧獲邀參加東莞一個音樂節。未知是否因為物傷其類特別火爆？還在為自己成年冇戲拍而忿忿不平？黃影帝不是說好「不黃」了嗎？ 話說黃秋生呢趟訪問認真火爆，但聞蘋果網站發放錄音片段，聽到影帝大大聲為盧凱彤平反：「依家係咪求其喺街指一個人話佢謀殺，佢就要拉去打靶？......佢(陳淨心)係茄喱啡，我先係主角，佢直情茄喱啡走去同導演講話劉德華個表情唔啱。」

粗穢言語罵淨心，物傷其類特火爆？

講到興起，秋生又用「魚缸清道夫」形容陳淨心：「食魚屙廢物維生，大家咁注重佢講嘢咪抬舉咗佢，佢又冇公職，我識佢係老鼠。」 不知就裡的人乍聽呢番粗穢言語，可能以為影帝同陳淨心好大仇口。隻抽俠睇返件事來龍去脈，其實人家只喺微博上提問一句：「去年力挺佔中的香港女歌手(盧凱彤)，為什麼會被邀請出席2015南方草莓音樂節（11月28日）？」質疑這種「既佔中又賺人民幣」的情形不合理。有甚麼問題呢？惹得黃秋生開火猛烈炮轟？人家沒有言論自由？是否言論自由屬於黃絲帶專利？質疑吓都唔得？乜黃影帝真係咁專制㗎？ 最令人搲晒頭的，莫過於黃影帝忽然無厘頭指控淨心係佔中幕後黑手：「X，佢先係佔中幕後黑手，唔係佢哋咁推波助瀾，冇咁嚴重，就係呢啲咁嘅人推波助瀾，先令佔領行動惡化，第一個應該有問題係呢啲咁嘅人，澳門都唔應該畀佢去。」講到咁深奧，其實大家明唔明佢噏乜？

山草藥噏得就噏，只辱警冇撐佔中？

唔明都好正常嘅，事關黃影帝講嘢不嬲都係無定向導彈，山草藥噏得就噏，一時狂鬧警察，一時又話冇撐佔中......究竟佢咩立場，可能連佢自己都唔清楚？ 至於一時幫黃影帝洗底去黃一時又靠佢把口出聲挺黃嘅《蘋果日報》咯喎，唉...... 而陳淨心今日就喺微博反駁：我揭發香港歌手盧凱彤曾經佔中，不應到內地賺人民幣，不知是否擊中黃秋生死穴，竟然不停被他在毒媒面前侮辱，說我是茄哩啡（跑龍套）、沒有公職、魚缸清道夫……他還顛倒是非黑白，污衊我是佔中幕後黑手，罵我搞亂香港！ 陳淨心及所有香港人，請記住，應講就要講，因為大家都有言論自由。 原圖：http://yule.sohu.com/20130205/n365561771.shtml 投票已截止，多謝支持