佔中後首個大型選舉曲終人散，泛民最大政黨民主黨奪得43個議席咁大把，明明比建制派政黨輸足九條街，卻堅稱區選結果令人「滿意」，聽到黨主席劉慧卿說：「我們覺得是合格的。」隻抽俠頓時打個O型嘴。 隻抽俠依稀記得上屆區選，白鴿黨總共奪得47個議席，今屆95人出選得43人勝出，即大剌剌無咗四席跌近一成，如果議席跌一成都叫合格，咁點先叫唔合格呢？原來白鴿黨都幾易滿足嘅喎！ 話說白鴿黨自我安慰條數係咁計嘅：因為當年當選嘅47人有幾個退黨，到今屆選前只剩42席，選後變成43席，便算「多了一席」。所以話人嘅嘢，只要有阿Q精神，就真係可以天下無敵，連黨員退黨都可以變成「進步契機」，唔到你唔服！ 而更加重要嘅係，多位紥根地區多年又知名度甚高的資深黨員幾乎全軍覆滅，包括去年奪超級區議會議席的前黨主席何俊仁、現任副主席尹兆堅和資深黨員陳樹英都連任失敗。根據白鴿阿Q邏輯，肯定又係「新老交接嘅契機」！ 講開白鴿退黨同議席大跌，其實都係卿姐班元老一手造成。因為佢哋班大佬一言堂唔畀新人上位，所以黨內新人不斷失，以今次區選當選比例最高的「新民主同盟」為例，就係當年白鴿黨分裂嘅產物。雖然隻抽俠對新民主同盟政見不敢苟同，但就地區工作來講，人哋就確實比班老鴿用心好多，只不過因為民主黨內大佬大過專權，黨內人才不斷流失，早有新同盟，最近又有黃成智同狄志遠，走吓走吓，睇怕將來都係王小二過年，一年不如一年咯。 原圖：http://www.bastillepost.com/hongkong/1-%E6%94%BF%E4%BA%8B/833486-%E6%B0%91%E4%B8%BB%E9%BB%A8%E4%B8%83%E5%90%8D%E6%88%90%E5%93%A1%E9%80%80%E9%BB%A8%E3%80%80%E5%8A%89%E6%85%A7%E5%8D%BF%EF%B8%B0%E8%A6%81%E4%BE%86%E5%89%87%E4%BE%86%E3%80%81%E8%A6%81%E8%B5%B0%E5%89%87