畢生爭取勞工權益的梁耀忠轉行做黑心僱主？話說昨日五一勞動節，一眾組織為了基層利益自然上街遊行，梁耀忠所屬的街工亦不例外。諷刺的是，在街工的出席者中，竟有人高舉「不要永續參選」、「結束一人專政」、「縮減勞工組，怎配叫街工」、「街工白頭翁，炒人好輕鬆」等標語，矛頭直指梁耀忠。原來，梁耀忠被指以財赤等理由唔肯出糧畀手足，仲叫人「返嚟做義工」，相當黑色幽默。

想叫人打免費工？

3名涉事街工員工分別是譚亮英、黎治甫和王曉君，屬街工勞工組的全部員工，合計年資逾30年，合計月薪約4、5萬元，即平均萬幾銀一個人，說高不高。他們指摘，梁耀忠以財赤、資源不足等為由，打算解散勞工組，話明「5月31日後就冇錢出糧」，卻又說「唔係解僱，都唔係解散，你哋得閒可以返嚟做義工」。嘩！如果係真嘅，梁耀忠擺明想叫人免費打工，仲衰過黑心僱主呀。

黑心僱主式回應？

對於這麼嚴重的指控，梁耀忠實行冷處理，借用黑心僱主很常用的句式回應記者：「冇乜回應」、「我覺得佢哋唔係講事實」等等。難怪有網民笑言，「五一勞動節最大笑話——爭取勞工權益嘅街工唔出糧畀伙記」。究竟事實真相如何，我哋只能買噸花生慢慢睇戲也！ 原圖：梁耀忠Facebook https://www.facebook.com/nwscleungyiuchung/

投票已截止，多謝支持