美國總統特朗普叫「讓美國再次偉大」叫咗咁多年，去到今時今日，「偉大」就見唔到喇，反而大家都睇到美國各行各業都不斷咁「萎」緊。一做番總統就雄心壯志咁挑起關稅戰，甚至連盟友小弟們都唔放過，真係以為霸權大晒可以挑戰全球。點知中國一句「不跪」就嚇窒侵侵，急急腳派人同中國開會降低額外加關稅，上星期仲放風話願意去搵我國國家主席傾偈。美國嘅態度轉變，已經冇晒之前意氣風發個樣。雖然把口仲係好硬淨，但佢似乎已經唔係好控制得住自己個膝頭哥喇！

想「再偉大」嘅又何止美國？印度總理莫迪喺各種國際會議上，多次喺座位前嘅名牌用「婆羅多」取代「印度」。有指因為「印度」呢個名有太強嘅殖民地色彩，而「婆羅多」呢個稱呼就更加local，係古印度一位被視為偉大君王嘅名，可以畀印度人懷緬返昔日榮光。而喺今年3月特朗普同莫迪會面嘅時候，莫迪亦都提出過「讓印度再次偉大」，甚至係「讓美印一起偉大」。勢估唔到兩個月唔夠，5月初印巴爆發邊境衝突，印度多架法國製「陣風」戰機被擊落，而拎到咁輝煌戰果嘅，正正係中國製嘅殲-10戰機同霹靂-15遠距導彈，有關戰果已經獲央視證實。今次已經唔係印度第一次輸畀中國，2020年時，印度趁中美貿易戰之際，就曾經推出千億計劃激勵製造業，妄想挑戰中國製造地位，但到今日已經被各界視為完全失敗嘅嘗試。

要講「再偉大」，又點可以唔提中國？早喺2002年，中國就提出「實現中華民族偉大復興」，之後一直積極推動中國製造、一帶一路等政策，喺政治、經濟、文化、科技、軍事各方面發奮圖強。今時今日，我哋已經有屬於自己嘅國產航母、飛機、晶片、操作系統，短短幾十年間，我哋嘅國家成長到霸權唔可以忽視嘅地步，促使特朗普喺佢第一個總統任期時發動對華貿易戰，又策動盟友一齊圍堵中國，實施各種經濟同技術嘅封鎖。但經歷過百年屈辱嘅中華民族，比任何人都明白，絕對唔可以屈服，唯有「不跪」，唯有自強，先至可以喺國際上取得立足之地。

「偉大」從來唔係靠口號就得嘅。真正嘅國家強大，係建基於實實在在嘅自主發展同民族凝聚力。美國同印度嘅空有雄心壯志，但係冇足夠毅力同韌性去支撐，終究係空談。反觀中國，默默耕耘、自力更生，用行動同成果說話，呢啲先係國家真正走向偉大嘅必由之路。當世界列強仲喺度諗緊點樣「再次偉大」嘅時候，中國已經一步一腳印，朝著「偉大復興」嘅方向前進緊，呢個差距，正係今日國際力量消長嘅最佳寫照。