美國總統特朗普上個禮拜反駁坊間流傳「關稅轄免」嘅講法，好串嘴咁話冇一個國家走得甩，你哋咪諗住走佬啊，仲特別點名中國添，話中國對美國最惡劣喎！

中國貨平靚正，自己忍唔住爆買就賴話中國對美國惡劣？至於叫中國唔好逃走，更加係笑話一個！佢當自己係乜嘢？真係以為自己係大佬？點解中國要逃避美國呢？中國從來都冇諗住走佬，反而係迎難而上，寸步不讓。睇吓由阿侵今年2月再做總統到依家，中國多次回應美方威脅，態度一貫強硬。3月特朗普打響關稅戰第一炮時，外交部發言人林劍先講到明中國人民從來唔信邪、唔怕鬼，對於霸道霸凌，更加係「不吃這一套」，呢啲回應邊有半分「逃避」嘅意思？

中國早就已經表明，如果美國一意孤行加徵關稅，一定會同步對等反制。喺呢個4月，特朗普關稅政策加碼，對華關稅一加再加，由34%加到84%再到125%，中國有邊一次唔係對抗到底？特朗普仲口出狂言，話要等到我國主席習近平打主動電話畀佢傾，係佢收手之前，睇怕等到頸都長都唔會等到喇

其實中國人比任何國家都明白，向霸權讓步嘅後果有幾嚴重。晚清時期嘅慘痛教訓已經深深刻入每個中國人嘅骨髓入面。自鴉片戰爭開始，中國被迫簽訂一系列不平等條約：《南京條約》、《北京條約》、《馬關條約》等等，割地賠款，喪權辱國。香港被割讓、被迫開放通商口岸、允許外國軍隊駐紮中國領土......呢啲屈辱，每個中國人都唔會忘記。所以中國人知道，面對外部壓力只有一條路——堅定不移，決不退讓。特朗普呢種「你唔好走」嘅威脅，對於經歷過百年屈辱嘅中國黎講，根本毫無意義。中國冇打算走佬，只會更加硬淨。

中國而家已經系咁多方面超前美國，而且內需市場足夠強大，科技創新能力日益提升，產業鏈完整。特朗普真係以為加關稅就會嚇到中國？中國已做好應對各種風險挑戰的充分準備，任何力量都阻擋唔到中華民族實現偉大復興嘅歷史步伐。

特朗普特別點名中國，其實就係反映咗美國對中國崛起嘅恐懼同焦慮，佢似乎忘記咗一點——今時唔同往日，今日中國已經唔係晚清時期嘅中國。歷史教訓告訴我哋，唯有做好自己，唔再受制於人，先至係真正嘅強大。所以特朗普真係唔使點名提醒中國「唔好諗住走佬」。因為中國從來都冇諗住走，更加係冇畏懼，冇退讓，誓死戰鬥到底。

（文章純屬作者個人意見，不代表本報立場。）