新一年本費Ching先祝大家蛇年快樂，新年行大運！中國傳統上「債不能欠過年」，如果唔係就成年都冇錢淨，如果唔想影響新一年財運呢，就一定要喺年前還清所有債務。雖然美國佬就未必相信呢一套，不過我哋中國人一向推己及人，有中國記者就好貼心咁「溫馨提醒」，喺1月21號嘅聯合國記招上，問到美國家陣到底仲爭緊聯合國幾多錢，又覺唔覺得新任總統特朗普會喺任內找數。

根據聯合國嘅回應，原來美國仲爭緊聯合國足足218億港幣，當中包括聯合國常規預算攤款、維和預算同法庭預算。至於特朗普會唔會找數？聯合國只係話過去咁多屆美國政府都有畀會費資金，並冇直接回應記者嘅提問。

現年78歲嘅特朗普生肖屬狗，本費Ching掐指一算（即係上網睇風水佬講），今年蛇年正係「狗運之年」，屬狗者將會迎嚟「巔峰之年」，正係特朗普大展拳腳嘅好機會，但如果佢因為欠債而影響運程，「巔峰」兩隻字就未必係呢個寫法了，如果有人識其他同音字寫法可以教吓本費Ching。

要知道「負債纍纍」嘅美國同特朗普，所欠嘅又點止呢區區200幾億？由敘利亞到阿富汗、由烏克蘭到黎巴嫩，有邊個唔係畀美國拖欠緊一筆又一筆腥臭嘅債務？呢條數美國到底會唔會找，又找唔找得起？真係單眼佬都知！

就算喺中國嘅台灣同香港，美國佬同樣都有一大筆數未找。試諗吓台灣民進黨收咗美國幾多名為「希望」實質係「妄想」嘅空頭支票，令台海陷入愈嚟愈嚴峻嘅危機，你話呢筆數係咪要算落美國頭上先？喺香港更加係有一班人覺得美國欠咗自己，當初仆心仆命咁「攬炒」香港，點知家陣成班友仔顛沛流離，去咗唔同國家做難民，隨時心入面仲怨緊美國欠咗自己一張「綠卡」添呀。

再數落去真係搞唔得掂，唯有祝啱啱先做返總統嘅特朗普新一年好自為之啦。

（文章純屬作者個人意見，不代表本報立場。）