相信有留意台灣地區新聞嘅朋友都知道，台灣議會嘅亂絕對算得上係「世一」，議會打架、立委鬥毆幾乎已經成為台島傳統，甚至可以話係台灣一道「最美麗嘅風景線」，只要遇到唔啱自己心水嘅事，居然唔係解決問題，而係用暴力解決提出問題嘅根源，有住咁樣嘅風氣，民進黨居然仲有面以「民主制度」做招牌，面皮都真係薄少少都做唔出。

台灣地區國民黨喺12月20日闖關三讀選罷法、財劃法、憲訴法等法案，點知喺前一晚嘅12月19日夜晚10點幾，民進黨立委竟然兵分多路，夜襲立法院，甚至破窗而入，最終攻佔主席台，並封鎖議會大門，用膠水封死鎖頭，阻止其他黨派人員同傳媒入去採訪，簡直係當自己係議會嘅主人，呢種行為完全踐踏民主程序。

而最荒唐嘅莫過於，民進黨立委黃捷竟然仲好威威咁喺Facebook上po出議會場內即時畫面，聲稱係「捍衛人民權利」，又話「台灣民主不能退」，唔可以令台灣「香港化」。要知道國民黨嗰班同樣都係民選議員，民進黨自己唔夠票阻止自己唔鍾意嘅議案，居然就暴衝議會，咁樣做真係令本費Ching不禁諗番起當年香港班黑暴，同樣都係借暴力宣泄不滿，強行破門攻入香港立法會內大肆破壞。民進黨把口就話唔想令台灣「香港化」，但佢哋家陣嘅做法，似乎係想向香港黑暴「致敬」，唔知咁又算唔算係另類嘅「香港化」呢？

只能夠講，民進黨咁樣輸打贏要真係好肉酸，不過其實諗深一層又唔意外嘅，2021年特朗普喺總統選舉中輸咗畀對手拜登，當時就有大批特朗普支持者全副武裝荷槍實彈咁攻入國會山莊，向全世界示範乜嘢叫做輸打贏要嘅「美式民主」，呢樣嘢2019年喺香港見過一次，估唔到去到2024年嘅今日，居然可以喺台灣身上見多次，將呢種「美式民主」學得有模有樣！

可以見到，政治操作已深深扎根於島內政治文化之中，韓國總統尹錫悅早排先搞完「短命戒嚴」，依家搞到一身蟻，唔知台灣地區領導人賴清德又會唔會想有樣學樣呢？

（文章純屬作者個人意見，不代表本報立場。）