美國候任總統特朗普呢排「氣勢如虹」，講到明出年1月重返白宮後，會對加拿大進口商品加徵25%關稅，嚇到加拿大總理杜魯多即刻打電話搵佢表忠，恨不得即刻飛過去親吻特朗普嘅鞋底，卒之隔冇幾多日，杜魯多一有空檔，就急急腳親自飛去美國海湖莊園，「覲見」都仲未係美國總統嘅特朗普，堂堂一國元首，竟然對一個商人卑躬屈膝，丟盡自己國家嘅架，認真肉酸！

據霍士新聞12月2日報道指，杜魯多11月29日突訪海湖莊園想搵特朗普討論美加兩國關係，但係佢哋食晚飯之前就有一段小插曲，特朗普喺毒品同非法移民問題上，毫不留情咁數臭加拿大；當講到兩國貿易時，特朗普更加激動，話美國對加拿大嘅貿易逆差超過1000億美元。呢個時候重頭戲就嚟啦，特朗普竟然表示，如果加拿大冇咗美國呢1000億美元就冇辦法生存嘅話，加拿大就應該直接成為美國第51個州。

消息人士就透露，特朗普呢一個小小嘅「玩笑」令包括杜魯多在內嘅在場人士都尷尬咁笑，不過杜魯多當然就唔敢當場發難啦，特朗普亦繼續追擊，話杜魯多可以成為第51州州長，更進一步提議加拿大可以分為一個保守派州和一個自由派州。一個國家嘅未來總統，居然當住另一個國家嘅總理面前，討論「招安」之後點樣處理對方嘅國土，究竟呢個係「玩笑」定係公開羞辱？如果換轉由杜魯多對住特朗普開一樣嘅「玩笑」，又會有咩後果？

當然本費Ching都明白大丈夫能屈能伸嘅道理，但縱觀歷史上嗰啲忍辱負重嘅君王，有邊個唔係要仰人鼻息嘅亡國之主，喺度臥薪嘗膽等機會翻身？而無論加拿大喺杜魯多治下有幾咁折墮都好，始終都係世界上最富裕國家之一，屬世界第十大經濟體，更加係五眼聯盟成員國，好好醜醜都算得上列強，同「亡國」相距甚遠，但身為總理嘅杜魯多，竟然一啲骨氣都冇，姿態仲衰過亡國之主，難怪特朗普一啲都唔畀面，當眾羞辱佢啦。

特朗普畀咗咁多羞辱，杜魯多都吞晒落肚，聲都唔敢聲，驚死喺嘴角流返出嚟，又一次示範咗，點樣做一個合格嘅「美國超級跟班」。

（文章純屬作者個人意見，不代表本報立場。）