美國候任總統特朗普出年1月重掌白宮，仲未坐入橢圓形辦公室，已經隔空指點江山，講明上任後嘅激進方針。除咗中國依舊雲淡風輕，班歐洲佬就已經係手足無措，驚到要死，諗爆頭日後點樣應對特朗普嘅關稅大棒。但其實頭痕嘅除咗歐盟之外，英國一樣煩緊選邊站嘅問題，喺各方勢力嘅夾縫中求存。

話說返2020年，英國喺特朗普嘅「鼎力支持」下，正式退出歐盟。不過特朗普好快就喺同年嘅大選輸畀拜登而落台；而英國失去歐盟成員國嘅身份，需要同一大堆歐洲國家重新簽訂貿易協定，經濟同社會問題一籮籮，國力一落千丈。同其他一樣經歷過新冠疫情、俄烏衝突、能源危機嘅西方盟友相比，英國更加係G7中經濟增長率最低嗰一個。

最近喺當地時間11月14日，英國央行英格蘭銀行總裁貝里同英國財政大臣雷里夫斯分別發表咗對英國同歐盟關係嘅睇法。貝里呼籲新上台嘅工黨政府應該同歐盟重建聯繫；而雷里夫斯喺同一場合提到，英國需要「重設」同歐盟嘅關係。似乎佢哋都認為，應該黐返埋歐盟度先有運行。

不過特朗普嘅高階經濟顧問摩爾之後接受英國BBC電台訪問時，就對英國嘅貿易政策方向提出咗明確嘅建議。摩爾表示，英國喺處理貿易事務上應該同美國保持一致嘅立場，而唔係追求同歐盟有更緊密嘅連結。摩爾批評歐盟採取「社會主義模式」，並暗示如果英國政府更重視同歐盟嘅經濟關係，大於美國嘅經濟關係，美國對於同英國簽署自由貿易協定嘅興趣就會降低，要求英國更加靠攏美國嘅立場，講白啲即係逼迫英國喺美國同歐盟之間揀一邊，唔好諗住兩邊都黐。

喺中英關係方面，英國亦面臨微妙嘅平衡。中國作為全球第二大經濟體，對英國市場有重要影響力。英國一方面想保持同中國嘅貿易往來，特別係吸引中國企業嘅投資。例如《金融時報》近日報道，嚟自中國嘅敬業集團打算關閉喺英國嘅鋼鐵廠房，可能危及超過2000個工作崗位，嚇到英國商務大臣開出價值20億英鎊嘅橄欖枝企圖挽留；當然啦，喺維持對華關係嘅同時，英國亦要應對來自美國嘅壓力。

英國真係夠晒慘，一方面想靠攏歐盟取暖，一方面又怕失去美國嘅支持，仲要小心翼翼處理同中國嘅關係。可以睇到喺如今大國博弈中，早就冇咗英國嘅位置，只能夠好似一隻無頭蒼蠅，亂撞一通。由昔日全球帝國淪為到而家「吊吊揈」嘅局面，認真令人唏噓！

（文章純屬作者個人意見，不代表本報立場。）