中東局勢依然得個「亂」字。以色列國防軍10日凌晨空襲加沙地帶南部城市汗尤尼斯一個帳篷營地，造成至少40人死亡，60人受傷。加沙民防機構指，遇襲嘅係馬瓦西嘅一個人道區域；以軍則指打擊嘅係在人道區運作嘅哈馬斯指揮與控制中心，指控哈馬斯濫用民用和人道基礎設施，包括指定的人道區域，對以色列展開恐怖活動。

要言之，以巴各說各話，炮火聲中，誰講真話誰講假話亦難以分辨。睇吓美國國務卿布林肯走訪中東調停，大大話話都成九次，可惜均不得要領，可見以色列總理內塔尼亞胡根本一心要趕盡殺絕，以鞏固權力，對美國總統拜登提出的「兩國方案」，私底下根本嗤之以鼻。

巴勒斯坦權力機構早前撰寫聯合國決議草案，根據國際法院7月發表嘅諮詢意見，要求以色列在6個月期限內結束對巴勒斯坦領土的非法佔領。英媒報道，聯合國大會下周將就草案進行表決。事實上，以哈雙方經常為人質、釋放囚犯而爭持不休，以至卡塔爾、埃及努力斡旋下，多次無功。看來，聯合國亦無牙老虎而已。

以色列軍方今個月初在加沙隧道尋獲6名人質遺體，相信是哈馬斯所為，事件立刻引爆以色列50萬人上街抗議、罷工，要求政府營救剩下人質。然而，以色列政府唔嗲唔吊，引發更多以色列民眾怒火街頭，雖然以色列法庭介入，令罷工行動提前了3個小時結束，但人民的怒吼，讓全世界看到以色列民心背離，十分厭戰。

呢次內塔尼亞胡都知道驚，皆因今趟係國內主要製造商和高科技領域企業家支持，換言之，內塔尼亞胡嘅壓力並非來自政界口水佬，而係有經濟實力、有選票壓力的聯合陣線。自以哈衝突以來，以色列社會動盪、經濟插水，蒸發的財富已是天文數字，民生凋蔽，以前的繁榮景象已一掃而空，商界及打工仔一直要求，政府要以人質生命及經濟為優先考慮，要尋找以巴和平，讓雙方真正停火！

在以哈衝突一直表示強硬、絕不手軟的內塔尼亞胡，似乎見到人民的怒吼並非一時衝動，態度也有所改變，就在總罷工同日，以色列派遣軍事部長戈夫曼到訪莫斯科，希望俄羅斯普京出手，皆因俄方與哈馬斯組織「有計傾」，盼望真係能令雙方坐下來止戰促和！不過，中東局勢牽涉太多「恩怨」，伊朗、黎巴嫩真主黨又對以色列殺害其高層心懷不忿，看來，中東和平之路荊棘滿途！而內塔利亞胡一日不下台，以哈和談一日難見曙光！

原圖：Benjamin Netanyahu Facebook影片截圖

https://www.facebook.com/Netanyahu/videos/499243002744075

文章純屬作者個人意見，並不代表本報立場