俄羅斯總統結束北韓行程，在當地時間6月20日凌晨飛抵越南首都河內，展開對越南嘅國事訪問。普京相隔24年訪問北韓，而今次訪問越南，就係自2017年以來再次造訪，只相隔7年，比起再訪北韓，算唔上隔得長喇！事實上，今次也是普京第5次訪問越南。

抵達越南前，普京於越南媒體發表文章，讚揚越南以務實嘅方式處理俄烏戰爭。普京又話，俄越兩國加強雙邊關係，互惠互利；又指能源在彼此的合作上有戰略重要性；至於金融及貿易方面亦有進展。

普京嘅訪問越南，有報道認為突顯喺共產黨治下嘅越南對俄羅斯忠誠。之不過，大家如果唔善忘，當記得去年9月，美國總統拜登訪越南，兩國跳級達成「全面戰略夥伴關係」；而中方與越南關係向來密切，除咗早於老美建立「全面戰略夥伴關係」，還有「具有戰略意義的命運共同體」。

越南近年來成為「搶手貨」，不但老美巴結，中國也極力拉攏。去年12月中旬，中國國家主席習近平也對越南進行國事訪問，雙方簽署了30多項合作協議，並將中越關係描述為「同志加兄弟」，兩國「山水相連、唇齒相依」。

當今之世，試問有邊個國家得到兩個超級大國如此青睞？

越南近年勵精圖治，在外交上如魚得水，中美兩大國對其大舉示好。如今普京又再國事訪問之，自是惹起美國不滿：美國和越南去年才達成全面戰略夥伴關係，咁快又向普京示好，算點先？美國駐越南大使館指摘任何國家都不應提供平台，讓普京宣揚侵佔別國的野心。而美國喉舌又拿國際刑事法庭（ICC）發出拘捕令說事，認為讓普京自由進出係違反國際法。

之不過，越南、俄羅斯甚至美國自己，都不是ICC成員，越南不用執行ICC向普京發出嘅逮捕令。越南只著眼於同俄羅斯大做生意，普京亦表示俄羅斯與越南在支付、能源及貿易等議題取得進展，指能源在兩國關係存有戰略重要性；俄羅斯又正著手喺越南設立核子科學技術中心。

美國的霸權主義已經失勢。普京今趟高調出訪北韓、越南，明顯是傳遞美國及西方國家想孤立俄羅斯，根本不會成功，可謂「君子自強不息」的最佳演繹。至於越南，除了再展現其「左右逢源」之道，亦反映它對美國並非凡事都順從，與中國及與俄羅斯結交，充分展示其外交自主，並非唯美國馬首是瞻！

原圖：新華社

文章純屬作者個人意見，並不代表本報立場