歐美國家有幾咁霸道，相信都唔使我多講，佢哋最鍾意將自己嗰一套所謂嘅「普世價值」強加喺其他國家身上，威逼又好利誘又好，總之就係要你跟曬佢哋嗰套，你試吓反抗吖，即刻當你係「異端分子」，一定出盡法子想搞殘你。近年歐美對華圍堵就係最好嘅例子，好在中國崛起夠硬淨，先頂得住列強各方面嘅圍攻，為地球保留番一片難得嘅淨土。

放學收工返到屋企，諗住打機relax吓，點知歐美魔爪無孔不入，就連遊戲界都不能倖免。近日有爆料指，中國遊戲開發商「遊戲科學」(Game Science)透露，旗下以中國名著《西遊記》為背景嘅國產遊戲《黑神話：悟空》遭到加拿大「政確顧問」公司Sweet Baby Inc.「勒索」高達700萬美元(約合5467萬港元)嘅美其名「顧問費」，以向遊戲提供「政確指導」，而當「遊戲科學」拒絕後，有指「政確顧問」就聯合其他一丘之貉嘅歐美遊戲媒體，以唔同嘅方向攻擊「黑悟空」。

被指與Sweet Baby關係密切嘅遊戲媒體IGN法國分部，此前就拎孫悟空從耳仔抽出金箍棒一幕借題嘲諷，遭中西網民痛罵「典型的無知與傲慢的展現」、「不懂中國文化」、「先讀原著再說吧」，IGN法國隨即刪文致歉，話只係一個「小玩笑」，但就發曬晦氣咁話，為免再有唔愉快嘅事件發生，如果搵唔到專家核實對遊戲嘅評論，IGN就唔會再報道呢款遊戲喎。

近日遊戲向媒體公開試玩版，IGN又再衝出嚟，批評試玩版中唔見有女性角色，相信大家就算冇睇過《西遊記》原著，都應該知道唐僧幾師徒係男人嚟嘅，大部份妖魔鬼怪都係以動物為原型，劇情又未發展到蜘蛛精、白骨精出場，咁見唔到女性角色都好正常吖，冇嘢搵嘢講，睇怕佢要去搵《西遊記》作者吳承恩投訴先至得囉！一間歐美嘅公司，居然要教我哋中國人點樣講《西遊記》，今次真係學到嘢喇。

雖然有關爆料並未獲得「遊戲科學」親自證實，不過就有網民挖出Sweet Baby個CEO曾經喺一次有關遊戲製作活動上演說，講述如何「恐嚇勒索」遊戲公司，所以唔少玩家都認為今次爆料內容真確。

就好似一開始咁講，歐美最鍾意將自己認為「正確」嘅一套強加他人，若今次事件屬實，都只不過係霸權嘅縮影，一係你就跟我嗰一套去行，唔跟嘅，我咪抹黑你獨裁、唱衰你冇人權、話你違反規則囉，然後再借啲意聯合盟友杯葛你，搞經濟制裁、搞軍事恐嚇，種種小動作同「政確顧問」公司嘅所作所為，唔可以話係差唔多，只能夠話係一模一樣。歐美口中所謂嘅「普世價值」，說穿了其實都係為霸權利益服務，不過係包裝而已。

放眼世界，又有幾多國家可以受得住歐美霸權嘅壓力？慶幸我哋生而為中國人，有著炎黃子孫獨有嘅傲骨，更有一個強大嘅國家做後盾，才不至於要向歐美霸權卑躬屈膝。

（文章純屬作者個人意見，並不代表本報立場）