優勢劣敗，從商如是，打仗亦如是。

俄烏戰事打咗將近兩年，烏克蘭總統澤連斯基敗象已呈，主因筆者一早已指出：長貧難顧！澤連斯基一味向美歐伸手要軍援，而且每次均獅子開大口。起初無論金錢及軍火，美歐多樂意供給。然而，烏克蘭「大反攻」近兩年，一啲進展都冇，更越戰越縮。

澤連斯基明顯係扶不起嘅阿斗。歐美為烏克蘭投入龐大嘅金錢武器軍援，美國自拜登政府2021年上台後，已向烏克蘭提供天文數字的援助，不久前澤連斯基又再攤大手板爭取600億美元援烏撥款，直頭當老美係取之不盡、用之不竭嘅萬能提款機！既然「大反攻」冇料到，再援助下去都係得個「吉」！呢嘞！反對「援烏抗俄」嘅匈牙利極右總理歐爾班，其盟友不久前在華盛頓與共和黨人會談，密謀推動結束美對烏克蘭嘅軍事支持。

如今，無論美國還是歐盟，都對援烏有所保留，德國智庫一個研究所不久前嘅報告，顯示烏克蘭今年8至10月間新得嘅援助承諾，按年跌近九成，總額僅有21億歐元，為俄軍侵烏以來最低水平。客觀上分析，烏克蘭有巨大兼長期資金壓力，也迫切需要武器等軍援。美國國防部長奧斯汀早前到訪基輔時，烏克蘭武裝部隊總司令扎盧日內竟然夠膽死要求提供1700萬枚炮彈，兼且埋怨總統辦公室干涉指揮。奧斯汀梗係對烏克蘭需要咁鬼多炮彈驚訝啦，因為全世界都搵唔到咁多呀！都真係有乜總統，就出乜嘢手下，一個二個唔嗅米氣，講嘢堅離地！以如此無知厚臉皮之輩同強人普京鬥，怎可能會贏！

普京治國真有一套，佢自1999年擔任俄總理至今，手握政權20多年，4次出任俄總統，先後被美國《時代》和《福布斯》雜誌評為世界最有影響力人物。人家嘅風雲人物形象係實至名歸，澤連斯基卻係搞笑版，一味攤大手板要錢！錢！錢！你估你真係「丐幫幫主」咩？

正所謂「天助自助者」，澤連斯基與強人普京係最強烈對比。普京那種自強不息嘅硬漢形象深入民心，佢決策果敢，手段強硬，尤其係處理國際關係和內政方面，早前佢以閃電手法平定瓦格納集團叛軍已顯強悍本色！講到對外，更係頂呱呱！俄羅斯先後遭西方至少11次制裁，美國尤其狼死，之不過，有用嗎？俄烏戰事下，2023年三季度俄羅斯國內生產總值按年率計算增長5.5%，預計2024年俄羅斯經濟增長速度，更加會係歐元區嘅3倍！

俄烏兩位領導人，實力如此懸殊，澤連斯基從任何角度看，都注定必輸。誠如普京所講，缺少西方嘅援助，烏克蘭戰爭同烏克蘭政府捱唔到多過一周。普京睇通睇透，是以佢提出嘅停戰條件，包括維持現有領土的轉變和去納粹化。去納粹化就係要政權更換，澤氏下台！而「維持現有領土的轉變」，即係之前被俄國佔領嘅土地冇得攞返！

當然，澤連斯基死要面，唔會咁快求和，何況如此屈辱？之不過，形勢比人強，當援烏之水乾塘，澤連斯基撐唔落去，到時再求和，只會樣更衰！

原圖：Володимир Зеленськи Facebook影片截圖

https://www.facebook.com/zelenskyy.official/videos/1434946680427584

文章純屬作者個人意見，並不代表本報立場