美國國務卿布林肯頻撲到中東斡旋以巴衝突，之不過，效果並不顯著。事實係佢日前再訪以色列，以軍向加薩採取更猛烈嘅海陸空攻勢，加薩難民營、醫院一再被炸，死傷枕藉，大多數係婦孺。
種種跡象顯示美國並不積極調停以巴衝突，可以預見，巴人於此次戰火洗劫下，唔知仲要死幾多無辜平民！呢，布林肯最後一站訪土耳其，有傳媒指出，佢此行受到冷待，唔獲安排與近日猛烈批評以色列嘅總統埃爾多安會面，抵達土耳其安卡拉機場時，亦未獲得土耳其高級官員迎接。可見盡管老美貴為世界軍事最強國，之不過面係人畀嘅，土耳其就係唔買你帳，吹咩？得道多助，失道寡助，老美就係過分偏袒以色列，抱住咁嘅態度去斡旋「人道立場」，不誠無物，梗係談不出個所以然！
美國首府華盛頓4號有數千人示威，要求以哈停火，示威者高舉「巴人的命也是命」等標語，並譴責拜登政策。英國媒體亦指出，拜登力撐以色列，雖然贏得猶太社區嘅支持，之但係冒上失去進步派支持嘅風險，損害其明年連任嘅機會。果不其然，美國總統選舉將於明年11月5日舉行，倒數一年民調紛紛顯示尋求連任嘅總統拜登形勢不妙，落後於極可能代表共和黨出選嘅前總統特朗普。當中《紐約時報》與西恩納學院5日發布民調指出：6個關鍵搖擺州份中，拜登係5個州落後於特朗普。原本支持拜登嘅有色人種及年輕選民亦開始𨍭軚，佢哋唔滿意拜登係處理經濟及以巴衝突等議題嘅手法，當然，仲有佢確實老到不適合當總統！
美國哥倫比亞廣播公司新聞5日發表全國民調，亦顯示特朗普支持率為51%，領先拜登約3個百分點。要言之，大多數美國人感到拜登政府路線失敗，亦唔相信佢有能力搞好經濟。唔好忘記，美國依家除咗盲撐以色列，另外俄烏戰爭持續60多個星期，依然膠着，烏克蘭總統依然伸手要多些軍援和戰機，無底黑洞，美國都真係開機印銀紙都印唔切！
再講，中東戰火紛飛，已經擴散開來！美國自以哈開戰以來，已調派「福特」號和「艾森豪威爾」號兩個航空母艦嘅戰鬥群到中東，5日罕有地係社交平台X公布，一艘「俄亥俄」級導彈核動力潛艇抵達地中海，分析指公開核動力潛艇無非向伊朗、也門胡塞武裝勢力釋出威懾信息，避免以哈戰事擴大。然而，老美一開始就盲撐以色列，其雙重標準再次赤裸暴露人前，一味恃軍事霸權想隻手遮天，結果引來全球反美怒潮！凡事去到太盡，必冇好結果！好戰必亡，忘戰必危。筆者依然認為「人無善志，雖勇必傷」！
原圖：U.S. Department of State網頁
文章純屬作者個人意見，並不代表本報立場
投票已截止，多謝支持
返回
