英國《自然》雜誌說：2015年9月，193個國家同意致力於改善世界各地人民嘅生活。主要係消除貧困和減少飢餓，到應對全球變暖和保護生物多樣性，可持續發展目標已經係企業計劃和政府政策中，佔據咗一席之地。然而，現在距離實現呢啲目標嘅最後期限——2030年，時間已經過半，仍有許多工作要做。

放眼世界，俄烏戰事由2022年2月24日至今，已打咗600多個日子，如今仍然戰事激烈；至於以巴戰火，自以色列為了報復10月7日遭哈馬斯突襲，繼續對加沙地帶連番空襲，令加沙地帶生靈塗碳，死傷枕藉。

筆者草此文時，以巴衝突近4個月，最新消息係已造成逾萬人死亡，當中巴人佔約八成半；而加沙流離失所巴人已逾140萬人。聯合國人權事務高級專員辦事處稱，以軍以不合比例武力攻擊賈巴利亞難民營引發大量平民傷亡，已構成「戰爭罪行」，亦有指控以色列如此對加沙地帶狂轟濫炸，等同向加沙實施「種族滅絕」。

如今內塔尼亞胡殺紅咗雙眼，佢睇到嘅只有仇恨，唔肯停戰！佢仲引用《聖經》指「和平有時，戰爭有時」，強調依家係「戰爭時刻」，呼籲人們於文明與野蠻之間選邊站。阿哥，呢啲嘛就係烏鴉落在豬身上，光看到別人黑看不到自己黑囉！究竟以色列狂轟濫炸加沙，導致加沙每日逾420名兒童被殺或受傷，難道可以自視為「文明」？正如有網民話齋，攞《聖經》做擋箭牌，咁都得？如按此邏輯，咁中國人都可以攞出《山海經》，證明「普天之下 莫非王土」，豈非全世界都係中國人的？

據美國政治新聞網Politico周三報道，美國總統拜登和官員談及以色列總理內塔尼亞胡可能將下台，拜登更建議內塔尼亞胡可向繼任人分享嘅經驗。華府預期內塔尼亞胡嘅總理任期有限，可能只餘數月，待以軍係加沙地帶嘅軍事行動早期戰鬥結束，內塔尼亞胡必然需為發生嘅事負責。據悉拜登上月出訪以色列時，私下敦足內塔尼亞胡謹慎行事，避免擴大戰事，優先考慮「兩國方案」，並注意消滅哈馬斯以外嘅行動，包括佔領加沙將面臨嘅挑戰。

以上未經華府證實，之不過空穴來風，未必無因。一個人去到太盡未必係好事，都話凡事留一線，他日好相見；筆者相信「人無善志，雖勇必傷」，內塔尼亞胡好戰，以色列即使重創哈馬斯，其國內經濟必下滑，民生亦必不好過！天怒人怨下，內塔尼亞胡下台並非冇可能！

文章純屬作者個人意見，並不代表本報立場

原圖：內塔尼亞胡網站