市民翹首以盼多時嘅《基本法》廿三條，如今終於有望重啟立法程序，身為香港嘅一份子，又點可以唔支持？

特區政府換屆在即，下任行政長官大熱人選李家超明言，《基本法》廿三條立法屬憲制責任，一旦成功當選，佢將與相關部門積極討論，並按社會實際情況推動立法工作，佢嘅立場非常明確：「必須做，也要盡快做」，相信佢絕對唔會令香港人失望！

香港2019年曾因為國安漏洞而備受威脅，李家超曾經喺黑暴肆虐期間擔任保安局局長，對此自然係深有體會。雖然經過香港警隊努力止暴制亂，加上國家出手訂立《港區國安法》，香港社會總算係重歸平靜，但正所謂居安思危，《基本法》廿三條既補充《港區國安法》未能涵蓋嘅範疇，精準打擊境內外反華勢力，遏止叛國、煽動叛亂及竊取國家機密等犯罪行為，與《港區國安法》相輔相成，共同成為香港社會繁榮穩定發展嘅基石，新一屆政府若真由李家超所帶領，又豈有唔立法嘅道理？

推遲到6月向立會提初步建議

保安局局長鄧炳強近日亦喺立法會上公開《基本法》廿三條草擬進度，雖因新冠疫情影響，要推遲到6月先會向立法會提交初步建議，但無疑亦為香港市民打下強心針，證明當局確實係做緊嘢，實實在在係有誠意推動立法，致力維護國家安全，以防黑暴勢力死灰復燃。

特區政府2003年推動廿三條立法失敗，為香港社會動蕩埋下禍根，非法佔中到旺角暴動，再到近年黑暴亂港，早已飽受摧殘嘅香港，現正面對一場同樣嚴峻嘅疫戰，我哋千瘡百孔嘅經濟及社會難以再承受任何考驗，如果再唔支持推動重啟廿三條立法，就真係枉為香港人！

原圖：星島日報

https://std.stheadline.com/realtime/article/1736696/