民協新領導層出爐！民協噚日（16日）舉行會員大會改選領導層，黨內元老、黃大仙區議員廖成利重掌主席，深水埗區議員李庭豐為副主席。其他職務方面，黃虹銘任秘書長、甄紹南任司庫；黨委員有李炯、楊彧、許錦成、覃德誠、譚國僑、利瀚庭及江貴生。廖成利話，由於改選得一人報名出選副主席，並未「齊腳」；佢話民協會「緊守崗位民生為本」，繼續做社區服務；期望新特首改善民生，亦希望可根據《基本法》落實雙普選，強化區議會等地方行政機制。

民協原正副主席施德來和何啟明，都因涉泛民初選案，而喺舊年1月被捕，再被控「顛覆國家政權罪」，期後雙雙辭去黨內職務。及後由楊彧、利瀚庭署理正副主席，但楊彧因撐已退黨的馮檢基參選而被批評，佢辭咗署理主席後，職務就一直吉住。由於疫情關係，呢次會員大會已被兩度押後；唔知係咪冇人肯做，先由曾喺2007年至2016年做過主席的廖成利「出山」坐鎮。李庭豐坦言民協規模細，一直都有財政壓力；近年該黨內多名區議員劈炮，而家民協得番6名區議員，財政問題應該仲緊張啦！

得番幾丁友，就盡力做好地區事務，服務市民，唔好搞事，好自為之啦！

原圖：頭條日報、星島日報

https://hd.stheadline.com/news/realtime/hk/2329410/

https://std.stheadline.com/realtime/article/1801521